ហូឡង់៖ តុលាការឧក្រិដ្ឋកម្មអន្តរជាតិ (ICC) ដែលមានមូលដ្ឋានក្នុងប្រទេសហូឡង់ បានចេញដីកាចាប់ខ្លួនប្រធានាធិបតីរុស្ស៊ី លោក វ្ល៉ាឌីមៀ ពូទីន ដោយលើកឡើងពីការជាប់ពាក់ព័ន្ធក្នុងការចាប់ពង្រត់កុមារអ៊ុយក្រែន។

ក្នុងសេចក្ដីប្រកាសព័ត៌មានចុះថ្ងៃទី១៧ ខែមីនា ឆ្នាំ២០២៣ តុលាការឧក្រិដ្ឋកម្មអន្តរជាតិ ICC បានសន្និដ្ឋានថាលោកពូទីន គឺជាអ្នកទទួលខុសត្រូវព្រហ្មទណ្ឌចំពោះឧក្រិដ្ឋកម្មខាងលើបើទោះបីមិនបានប្រព្រឹត្តិផ្ទាល់ក្ដីតែការអនុវត្តន៍គឺស្ថិតក្រោមអំណាច និងការគ្រប់គ្រងរបស់គាត់។

មនុស្ស១នាក់ផ្សេងទៀតដែលជាប់ពាក់ព័ន្ធនឹងការចេញដីកាចាប់ខ្លួននេះគឺលោកស្រី Maria Alekseyevna Lvova-Belova ស្នងការទទួលបន្ទុកសិទ្ធិកុមារនៅការិយាល័យប្រធានាធិបតីនៃសហព័ន្ធរុស្ស៊ីដែលតុលាការនេះបានលើកឡើងថាគឺជាអ្នកត្រូវបានចោទប្រកាន់ទទួលខុសត្រូវចំពោះឧក្រិដ្ឋកម្មនៃការនិរទេសប្រជាជនដោយខុសច្បាប់នៃចំនួនប្រជាជន (កុមារ) និងការផ្ទេរដោយខុសច្បាប់នៃចំនួនប្រជាជន (កុមារ) ពីតំបន់កាន់កាប់នៃអ៊ុយក្រែនទៅកាន់សហព័ន្ធរុស្ស៊ី បានប្រព្រឹត្តនៅក្នុងទឹកដីកាន់កាប់របស់អ៊ុយក្រែនយ៉ាងហោចណាស់ចាប់ពីថ្ងៃទី២៤ ខែកុម្ភៈ ឆ្នាំ២០២២។

តុលាការដែលមានមូលដ្ឋាននៅអឺរ៉ុបនេះបានលើកឡើងថា៖ «អង្គជំនុំជម្រះបានចាត់ទុកថា ដីកានេះមានលក្ខណៈសម្ងាត់ដើម្បីការពារជនរងគ្រោះ និងសាក្សី ព្រមទាំងការពារការស៊ើបអង្កេតផងដែរ។ ទោះជាយ៉ាងណាក៏ដោយ ដោយចងចាំថាការប្រព្រឹត្តិក្នុងស្ថានភាពបច្ចុប្បន្នកំពុងបន្ត ហើយការយល់ដឹងជាសាធារណៈអំពីដីកាអាចរួមចំណែកដល់ការទប់ស្កាត់ការប្រព្រឹត្តបទឧក្រិដ្ឋបន្តទៀត អង្គជំនុំជម្រះបានចាត់ទុកថាវាជាផលប្រយោជន៍នៃយុត្តិធម៌ក្នុងការអនុញ្ញាតឱ្យចុះបញ្ជីការ។ ដើម្បីបង្ហាញជាសាធារណៈនូវអត្ថិភាពនៃដីកា ឈ្មោះជនសង្ស័យ ឧក្រិដ្ឋកម្មដែលដីកាត្រូវបានចេញ និងរបៀបនៃការទទួលខុសត្រូវដែលបង្កើតឡើងដោយអង្គជំនុំជម្រះ»។

តុលាការឧក្រិដ្ឋកម្មអន្តរជាតិ គឺជាអង្គការអន្តររដ្ឋាភិបាល និងជាតុលាការអន្តរជាតិដែលមានទីតាំងនៅនៅទីក្រុងឡាអេ ប្រទេសហូឡង់។ តុលាការនេះចូលរួមក្នុងការប្រយុទ្ធជាសកលដើម្បីបញ្ចប់និទណ្ឌភាព ហើយតាមរយៈយុត្តិធម៌ឧក្រិដ្ឋកម្មអន្តរជាតិ តុលាការមានគោលបំណងរក្សាអ្នកទទួលខុសត្រូវចំពោះឧក្រិដ្ឋកម្មរបស់ពួកគេ និងដើម្បីជួយទប់ស្កាត់ឧក្រិដ្ឋកម្មទាំងនេះកុំឱ្យកើតឡើងម្តងទៀត៕